केळघर : केळघर घाटात आज दुपारी महाबळेश्वरकडून साताऱ्याकडे जाणारा मोठा ट्रेलर अडकल्याने घाटात सुमारे अर्धा तास दोन्ही बाजूने वाहतूक ठप्प झाली होती. याचा फटका महाबळेश्वरकडे जाणाऱ्या पर्यटकांना बसला.
विटा ते महाबळेश्वर या रस्त्याचे रुंदीकरण झाल्याने कोल्हापूर, साताऱ्याहून येणारे पर्यटक हे केळघर घाटातून प्रवास करणे पसंत करतात. सध्या उन्हाळी हंगाम शेवटच्या टप्प्यात असून, आज
विकेंडमुळे महाबळेश्वरला जाणाऱ्या पर्यटकांची चांगलीच गर्दी होती. दुपारी दोन वाजण्याच्या सुमारास केळघर घाटात काळा कड्यानजीक एका अवघड वळणावर एक महाकाय ट्रेलर साताऱ्याकडे जात होता. केळघर घाटातील रस्ता हा अरुंद असल्याने हा ट्रेलर काही काळ अडकून पडल्यामुळे रस्त्याच्या दोन्ही बाजूंना वाहनांच्या रांगा लागल्या. त्यामुळे घाटात वाहतूक विस्कळित झाली. सुमारे अर्धा ते पाऊण तास वाहनांच्या रांगा लागल्या होत्या.
